ཀི་དེབ་བསྐྱར་ཞིབ། དུང་དཀར་དང་ནགས་ཚལ་གནག་དུང་དུང་།

དུང་དཀར་དང་ ནགས་ཚལ་གནག་དུང་དུང་།

ལོ་འིསི་རྡོ་རྗེ་གིས་ བརྩམས་བསྒྲིགས་དང་ ཀུན་བཟང་དབང་འདུས་ཀྱིས་ སྐད་སྒྱུར་རྐྱབ་ཡོད་པའི་ ཨ་ལོའི་ལྷག་དེབ་ “དུང་དཀར་དང་ ནགས་ཚལ་གནག་དུང་དུང་” ཟེར་མི་དེ་ ཤེས་རིག་ལྷན་ཁག་དང་ རྒྱལ་སྤྱིའི་ཨ་ལོའི་སྲུང་སྐྱོབས་གཉིས་ མཉམ་འབྲེལ་གྱི་ཐོག་ལས་ སྤྱི་ལོ་༢༠༡༦་ལོ་ལུ་ སྤར་སྐྲུན་འབད་ནུག། ཀི་དེབ་དེ་གི་ ཕྱི་ཤོག་གུ་བཀོད་དེ་ཡོད་པའི་ བརྡ་དོན་དང་འཁྲིལ་བ་ཅིན་ ཀི་དེབ་དེབ་དེ་ འབྲུག་ཨ་ལོའི་ཀི་དེབ་རྩོལ་སྒྲུབ་ ཟེར་བའི་གཞི་ཚོགས་ཀྱི་འོག་ལུ་ འབྲུག་པའི་ཨ་ལོ་ཚུ་ལུ་ ཀི་དེབ་ལེགས་ཤོམ་ལྷག་ནི་གི་ གོ་སྐབས་སྤྲོད་ནིའི་དོན་ལུ་ སྤར་སྐྲུན་འབད་ཡོདཔ་ཨིན་མས། ཀི་དེབ་དེ་ ད་རེས་ནངས་པར་ རྒྱལ་སའི་ཀི་དེབ་ཚོང་ཁང་ཚུ་ནང་ལས་ དངུལ་ཀྲམ་༢༥༠་རེ་སྦེ་ ཉོ་ནི་འཐོབ་པས།

ཀི་དེབ་དེ་གི་ནང་དོན་དེ་ སྒོ་ཕྱུགས་སེམས་ཅན་དང་ མི་ དེ་ལས་ རང་བཞིན་གནས་སྟངས་ཚུ་གི་བར་ན་ འབྲེལ་བ་ག་དེ་སྦེ་ ཡོདཔ་ཨིན་ན་གི་སྐོར་ལས་ ཨིན་མས། ནང་དོན་དེ་ཡང་ སྒོ་ཕྱུགས་སེམས་ཅན་ དུང་དཀར་ཟེར་མི་ རོ་ཁྱི་དང་ དཀར་མོ་ཟེར་མི་ བྱི་ལི་ཕྱུ་གུ་ དེ་ལས་ དུང་དཀར་དང་ དཀར་མོ་གི་ཇོ་བདག་ ཀུན་མཛེས་ཟེར་མི་ཨ་ལོ་ ལོ་བརྒྱད་འབད་མི་བཅས་ ཁོང་གསུམ་གྱི་བར་ན་བྱུང་བའི་ སྲུང་གི་ཐོག་ལས་སྦེ་ སྟོན་མས། ཀི་དེབ་དེ་ནང་ སྲུང་གི་བྱུང་རིམ་དང་འབྲེལ་བའི་ པར་རིས་ཚུ་ བཙུགས་ཏེ་ཡོད་མི་དེ་གིས་ ཨ་ལོ་ཚུ་ ཀི་དེབ་ལྷག་ནི་ལུ་ སྤྲོ་བ་སྐྱེ་ཚུགས་ནི་ཨིནམ་མ་ཚད་ སྲུང་གི་བརྗོད་དོན་ཡང་ འཇམ་ཏོང་ཏོ་འབད་ ཧ་གོ་ནི་ཨིན་མས། སྲུང་དེ་ དང་ཕུའི་ཁ་རྒྱུན་གྱི་ སྲུང་བཟུམ་སྦེ་མེན་པར་ ཨ་ལོའི་སྲུང་གི་ ཁྱད་ཆོས་དང་ལྡནམ་སྦེ་འབད་ཞིན་ལས་ མིང་ཚིག་འཇམ་ཏོང་ཏོ་ཚུ་ ལག་ལེན་འཐབ་སྟེ་ བརྗོད་ཚིག་ ཐུང་ཀུ་ཐུང་ཀུ་སྦེ་ བྲིས་མི་དེ་གིས་ ཨ་ལོའི་ལྷག་ནི་གི་རིག་རྩལ་ ཡར་རྒྱས་གཏང་ནི་ལུ་ ཕན་ཐོགས་སྦོམ་འབྱུང་ནི་མས། ལྷག་པར་དུ་ཡང་ སྲུང་གི་ནང་དོན་དང་ པར་རིས་ཚུ་ལུ་བརྟེན་ཏེ་ ཨ་ལོ་ཚུ་གིས་ སྒོ་ཕྱུགས་སེམས་ཅན་གྱི་མིང་བཏགས་ཐང་དང་ སྒོ་ཕྱུགས་སེམས་ཅན་ གསོ་སྐྱོང་འབད་ཐང་གིས་གཙོས་པའི་ འབྲུག་པའི་ལམ་སྲོལ་ཚུ་ཡང་ ཧ་གོ་ནི་ཨིན་མས། དེ་འབདཝ་ད་ ཀི་དེབ་དེ་ནང་ སྐད་ཡིག་དང་ ཡི་གུའི་སྦྱོར་བ་དང་ སྡེབས་སྦྱོར་ ཚུ་གི་ཐད་ལུ་ ནོར་འཁྲུལ་ཡང་ ལེ་ཤ་ར་འདུག།

དེ་ཚུ་གི་གྲལ་ལས་ སྡེབས་སྦྱོར་གྱི་ ནོར་འཁྲུལ་ནང་ལུ་ཡང་ སྡེབས་སྦྱོར་འཛོལ་འཛོལཝ་ངེས་བདེན་ཨིན་མི་དང་ སྡེབས་སྦྱོར་ངེས་པ་མེདཔ་སྦེ་ བྲིས་བྲིསཝ་ དུས་གསུམ་གྱི་སྡེབས་སྦྱོར་འཛོལ་འཛོལཝ་བཅས་ ཁག་གསུམ་ཐོན་མས། དེ་ཚུ་གི་གྲལ་ལས་དང་པ་ བསྡེབས་སྦྱོར་འཛོལ་བ་ངེས་བདེན་ཨིན་མི་དེ་འབད་བ་ཅིན་ ཀི་དེབ་ཀྱི་ཕྱི་ཤོག་ནང་ ༡དན་ལུ་་་ ༢པར་རིམ་་་་་་ ༣སློབ་གྲ་་་་་ ༤སྤྲོ་བ་བསྐྱོད་་་་ ༥སློ་དཔོན་་་་ ༦འཛིན་སྤྱོང་་་་ ཟེར་ འབྲི་སྟེ་འདུག། དེ་ཚུ་ བསྡེབས་སྦྱོར་དང་འཁྲིལ་ཏེ་བྲི་བ་ཅིན་ དོན་ལུ། པར་རིས། སློབ་གྲྭ། སྤྲོ་བ་བསྐྱེད། སློབ་དཔོན། འཛིན་སྐྱོང་། ཟེར་འབྲི་དགོ་ནི་ཨིན་མས། དེ་བཟུམ་སྦེ་ རྩོམ་གཞུང་དངོས་ནང་ ༡ཕྱུག་གུ་་་་ ༢འཆོངས་ནི་་་་ ༣རྟག་ཞིབ་་་་ ༤སང་སྟེ་་ ༥དགའ་འཚོར་་་ ཟེར་འབྲི་སྟེ་ཡོད་མི་ཚུ་ཡང་ བསྡེབས་སྦྱོར་དག་པ་སྦེ་བྲི་བ་ཅིན་ ཕྱུ་གུ། མཆོངས་ནི། བརྟག་ཞིབ། སངས་ཏེ། དགའ་ཚོར་ ཟེར་འབྲི་དགོ་ནི་ཨིན་མས།

དེ་ལས་ སྡེབས་སྦྱོར་ངེས་པ་མེདཔ་སྦེ་བྲིས་བྲིསཝ་འདི་ ༡གནག་དུང་དུང་དང་ གནག་དུང་དུ་ ༢ལོ་རྒྱུས་དང་ ལོ་རྒྱུ་ ༣བཏགས་ནི་དང་ བཏག་ནི་ ༤གནག་མདོག་དང་ གནག་དོ་ ༥ཕར་ཧོངས་མ་དང་ ཕར་ཧོས་མ་ ༦བྱིན་ནི་དང་ འབྱིན་ནི་ ༧ག་ཏེ་དང་ ག་སྟེ་ ༨གནགཔོ་དང་ གནགཔ་ ༩སྦུགས་དང་ སྦུག་ཚུ་ཨིན་མས། དེ་ཚུ་ སྡེབས་སྦྱོར་ གདམ་ཁ་ཅན་ཨིནམ་བཟུམ་སྦེ་ སྤེལ་ཡི་སྤེལ་ཡི་ར་ འབྲི་སྟེ་འདུག། དེ་ཚུ་ མཛུབ་སྣོན་གྱི་ནོར་འཁྲུལ་ འོང་སྲིད་ནི་ཨིན་རུང་ བཏག་ནི་ཟེར་མི་འདི་ ཆོས་སྐད་ནང་ལུ་ ཕྱེ་འཐག་ནི་དང་ གོ་ལ་འཐག་ནི་གི་ མ་འོངས་པའི་བྱ་ཚིག་ལུ་འཇུགཔ་ལས་ དེ་དང་ནོར་འཁྲུལ་བྱུང་བྱུངམ་མེན་ན་ མནོ་བའི་དོགས་པ་ཡང་འདུག།

དུས་གསུམ་གྱི་སྡེབས་སྦྱོར་གྱི་ཐད་ལུ་ “གཟུགས་ག་ར་བསྐུམས་ཏེ་ཉལ་སྡོད་དོ་ཡོདཔ་མས་” “ཨ་རྟག་ར་སྐད་ཚར་དྲགས་སྦེ་བརྐྱབ་སྡོད་མི་” ཟེར་མི་ནང་ སྐུམ་དང་ རྐྱབ་གཉིས་ ད་ལྟ་བའི་བྱ་ཚིག་འོང་དགོ་ནི་བཟུམ་མཐོང་རུང་ རིམ་པ་བཞིན་དུ་ འདས་པ་དང་ མ་འོངས་པ་སྦེ་འབྲི་སྟེ་འདུག། དེ་བཟུམ་སྦེ་ “མ་མཐོང་ག་ཟེར་དྲི་ནུག་” “མིག་ཏོ་བཙུམ་སྟེ་ཉལ་སྡོད་ནུག་” ཟེར་མི་ནང་ དྲིས་དང་བཙུམས་གཉིས་ འདས་པའི་བྱ་ཚིག་ འོང་དགོཔ་བཟུམ་མཐོང་རུང་ གཉིས་ཆ་ར་ མ་འོངས་པའི་བྱ་ཚིག་ འབྲི་སྟེ་འདུག། མ་གཞི་ ད་ལྟོ་ དེ་བཟུམ་གྱི་གནས་སྟངས་ནང་ དུས་གསུམ་གྱི་བྱ་ཚིག་ ག་ཅི་འབྲི་དགོཔ་ཨིན་ན་ ལམ་ལུགས་ཁ་གསལ་ཅིག་མེདཔ་བཟུམ་འདུག། གལ་སྲིད་ དེ་བཟུམ་གྱི་ལམ་ལུགས་འདི་མེད་པ་ཅིན་ གོང་ལུ་བཀོད་དོ་བཟུམ་སྦེ་ དབྱིན་སྐད་ལས་རྟ་དྲངས་ཏེ་ གསར་རྩོམ་འབད་བར་ མ་བཏུབཔ་མིན་འདུག་མནོཝ་མས།

ཚིག་ཕྲད་ཀྱི་གྲལ་ལས་ དཀའ་ངལ་གཙོ་བོ་ར་ སྦེ་དང་འབད་གཉིས་ཨིན་མས། སྦེ་དང་འབད་གཉིས་ ༼༡ཤུགས་སྦེ་ འགྲོས་ཀྱིས་འབད་ ༢སྐད་ཚ་དྲགས་སྦེ་ སྟུགས་པགས་པ་འབད་ ༣ག་ཅི་སྦེ་ ག་དེ་འབད་ ཟེར་དོ་བཟུམ་༽ བྱ་བའི་ཁྱད་ཚིག་དང་ མིང་གི་ཁྱད་ཚིག་ དྲི་ཚིག་ཚུ་གི་མཐའ་མར་ ངེས་པ་མེད་པར་ འཇུགཔ་བཟུམ་སྦེ་ འབྲི་སྟེ་འདུག། སྦེ་དང་འབད་ཀྱི་ དཀའ་ངལ་འདི་ ཀི་དེབ་འདི་ནང་རྐྱངམ་གཅིག་མེན་པར་ རྫོང་ཁའི་དཔེ་དེབ་ ལེ་ཤ་ཅིག་ནང་ར་ མཐོངམ་ཨིན་མས། དཀའ་ངལ་འདི་ རྫོང་ཁའི་སློབ་སྟོན་པ་དང་ སྐད་ཡིག་གི་མཁས་མཆོག་ཚུ་གིས་ འཕྲལ་མགྱོགས་སྦེ་ར་ བསལ་དགོཔ་འདུག། དེ་མིན་པ་ཅིན་ སྐད་ཡིག་གི་ གཞི་འགྱམ་བཙུགས་པའི་བསྒང་འབད་མི་ ཨ་ལོ་ཚུ་ མགུ་འཐོམས་ཏེ་ སྐད་ཡིག་གི་གཞི་འགྱམ་ཚུད་ནི་ལུ་ གནོད་ནི་མས། དེ་ལས་ ༼དུང་དཀར་གི་ དུང་དཀར་གིས་ ལམ་གི་ གསེར་གི་ ཟེར་དོ་བཟུམ་༽ བྱེད་སྒྲ་དང་འབྲེལ་སྒྲའི་ཕྲད་ རྗེས་འཇུག་གི་ ཐོབ་ལམ་དང་མ་འཁྲིལཝ་དང་ ༼འཚའ་ཡོད་པའི་གི་ཟེར་༽ འབྲེལ་སྒྲ་གཉིས་བརྩེགས་བྲིས་བྲིསཝ་ གུ་དང་གུར་ ཁ་དང་ཁར་ ཁོ་རང་དང་ཁོ་ར་ཚུ་ གདམ་ཁ་ཅན་སྦེ་འབྲི་མི་དེ་ཡང་ དཀའ་ངལ་ཅིག་ཨིན་མས།

སྐད་ཡིག་གི་ཐད་ལས་འབད་བ་ཅིན་ ངག་གཤིས་དང་མ་མཐུནམ་དང་ བརྡ་སྤྲོད་ཀྱི་གཞུང་དང་མ་མཐུནམ་ ཁག་གཉིས་སྦེ་འདུག། སྲུང་གི་འགུ་ལུ་ དུང་དཀར་ཟེར་མི་རོ་ཁྱི་གི་ངོ་སྤྲོད་ནང་ལུ་ ཁོ་ལུ་རྣམ་ཅོག་ཀྲོང་ཀྲོང་དང་ མིག་ཏོ་གསེར་གྱི་མདོག་བཟུམ་ པགས་ཀོ་གནགཔོ་ སྟུགས་པགས་པ་འབད་ ཡོདཔ་ཨིན་མས་ཟེར་བཀོད་མི་དེ་ པགས་ཀོ་གནགཔོ་ཟེར་མེན་པར་ སྤུ་ཁ་གནགཔོ་ ཟེར་བཀོད་པ་ཅིན་ རྫོང་ཁའི་ངག་གཤིས་དང་ འཁྲིལ་ནི་ཨིན་མས། བྱམོ་སྡེ་ཚན་གཅིག་ ཨ་རྟག་རང་ སྐད་ཚར་དྲགས་སྦེ་ རྐྱབ་སྡོད་མི་དང་མཉམ་ ཟེར་མི་དེ་ ཨ་རྟག་རང་ སྐད་ཚར་དྲགས་སྦེ་རྐྱབ་སྡོད་མི་ བྱམོ་སྡེ་ཚན་གཅིག་དང་མཉམ་ ཟེར་བྲི་བ་ཅིན་ བརྡ་སྤྲོད་ཀྱི་གཞུང་དང་མཐུན་ནི་མས། དུང་དཀར་འཚོལ་བར་སོང་སྟེ་ སྒོ་ར་ཁར་ལྷོདཔ་ད་ ཟེར་མི་དེ་ཡང་ དུང་དཀར་ བྱི་ལི་ཕྱུ་གུ་ འཚོལ་བར་སོང་སྟེ་ སྒོ་ར་ཁར་ལྷོདཔ་ད་ ཟེར་བ་ཅིན་ བརྡ་སྤྲོད་པའི་གཞུང་དང་འཁྲིལ་ནི་ཨིན་མས། དེ་མེན་པ་ཅིན་ དུང་དཀར་དེ་ འཚོལ་བར་འགྱོ་མི་མེན་པར་ འཚོལ་ནི་གི་དངོས་པོ་སྦེ་ གོ་བ་ལོན་ནི་ཉེན་ཁ་འདུག། ངག་གཤིས་ནང་ལུ་ བྱ་པོད་དང་བྱམོ་ཉལ་ས་ལུ་ གདང་ཟེར་སླབ་དོ་ཡོདཔ་ལས་ བྱམོ་ཚུ་ནི་ ཁོང་རའི་ཚང་ནང་ འཛུལ་ཚར་ནུག་ཟེར་མེན་པར་ གདང་གུར་འཛེགས་ཆི་ནུག་ ཟེར་བྲི་དགོ་ནི་ཨིན་མས། ཁོ་འགྱོ་སའི་ལམ་ཁར་ ཤིང་གཅིག་གི་གུ་ལས་ ག་ཅི་ཨིན་ན་མ་ཤེས་པར་གནགཔོ་གཅིག་ ཟེར་མི་དེ་ཡང་ ཤིང་ཅིག་གུ་ལས་ ག་ཅི་ཨིན་ན་མ་ཤེས་པའི་གནགཔོ་ཅིག་ ཟེར་བྲི་ནི་དང་ ཡང་ཅིན་ ག་ཅི་ཨིན་ན་མ་ཤེསཔ་ གནགཔོ་ཅིག་ ཟེར་བྲི་བ་ཅིན་ བརྡ་སྤྲོད་པའི་གཞུང་དང་འཁྲིལ་ནི་ཨིན་མས། སོ་བཏབ་པར་འོང་དེས་ཟེར་ བྱེལ་སྐད་ཤོར་ནུག་ཟེར་མི་དེ་ཡང་ འདྲོགས་སྐད་ཤོར་ནུག་ཟེར་བྲི་ནི་དང་ ཡང་ན་ སྐད་ཤོར་ནུག་ཟེར་ བྲི་དགོ་ནི་ཨིན་མས། བྱེལ་སྐད་ཤོར་ཟེར་མི་དེ་ ལགས་སོ་སྐུ་ཆེ་ཟེར་ གསོལཝ་བཏབ་དགོཔ་ཐོན་མི་ལུ་སླབཔ་ཨིན།

བཅུད་བསྡུ་བ་ཅིན་ གོང་ལུ་བཀོད་དོ་བཟུམ་སྦེ་ ཀི་དེབ་འདི་ ཨ་ལོ་ཚུ་གི་རྒྱུད་ལུ་ རྫོང་ཁའི་ལྷག་རྩལ་ཡར་རྒྱས་གཏང་ནིའི་དོན་ལུ་ འོས་འཚམས་ལྡན་པའི་ ལྷག་དེབ་ཅིག་ཨིན་མས། ཨིན་རུང་ ཀི་དེབ་འདི་ནང་ལུ་ བསྡེབས་སྦྱོར་འཛོལ་བ་དང་ བརྡ་སྤྲོད་པའི་གཞུང་དང་འགལ་བ། དེ་ལས་ སྐད་ཡིག་གི་ངག་གཤིས་དང་མ་མཐུནམ་ དག་པ་ཅིག་ཡོདཔ་ལས་ དེ་ཚུ་གིས་སྦེ་ ཨ་ལོའི་རྒྱུད་ལུ་ གནོད་པ་ཡང་ འབྱུང་སྲིད་ནི་ཨིན་མས། དེ་འབདཝ་ལས་ གོང་གི་སྐྱོན་ཚུ་ ལེགས་བཅོས་འབད་ཚུགས་པ་ཅིན་ ཀི་དེབ་འདི་གིས་ ལྷག་མི་ཨ་ལོ་ཚུ་ལུ་ ཕན་རླབས་ཧེང་བཀལ་ར་ འབྱུང་ནི་ཨིན་མས།