འབྲུག་ལུ་ དཔེ་ཆའི་ལམ་སྲོལ་ ནམ་ལས་བྱུང་ནུག།

འབྲུག་ལུ་ དཔེ་ཆའི་ལམ་སྲོལ་དེ་ འགོ་ཐོག་ནམ་བྱུང་ཡོདཔ་ཨིན་ན་ ཏན་ཏན་ཅིག་སྦེ་ མ་ཤེས་རུང་ དུས་རབས་༡༠་པའི་གོང་ལས་ བྱུང་ཡོདཔ་ངེས་བདེན་ཨིན་མས། འདི་གི་རྒྱུ་མཚན་ཡང་ དང་པ་ དུས་རབས་༡༠་པ་དང་༡༡་པ་ནང་ བོད་ལས་མར་ གཏེར་སྟོན་པ་མང་རབས་ཅིག་བྱོན་ཏེ་ བུམ་ཐང་དང་སྤ་རོ་ལས་ ཆོས་གཏེར་ལེ་ཤ་ བཞེས་ནུག། དེ་ཡང་ བོན་པོ་བྲག་ཚལ་པ་གིས་ དཀོན་མཆོག་གསུམ་ལྷ་ཁང་ནང་ལས་ རྫོགས་ཆེན་གྱི་ཆོས་སྐོར་དང་ རཀྵ་ཆོས་འབར་གྱིས་ གཅལ་ཁའི་བྱག་གུ་ལས་ མ་མོ་དང་ འཇིག་རྟེན་དྲེགས་པའི་རྒྱུད་ གཏེར་ལས་བཞེས་ཡོདཔ་ཨིན་མས། དེ་བཟུམ་སྦེ་ བླ་མ་གྲུམ་པ་གིས་ སྤ་རོ་སྐྱེར་ཆུ་ལྷ་ཁང་གི་ཡ་ཐེམ་ལས་ གཟའ་རྒོད་སྤུ་གྲིའི་དྲག་སྔགས་དང་ ཀུ་ས་སྨན་པ་གིས་ གཅལ་ཁའི་བྱག་གི་ལོགས་ལས་ སྨན་གྱི་ཆོས་སྐོར་ གཏེར་བཞེས་ཡོདཔ་ཨིན་མས། རྒྱུ་མཚན་གཉིས་པ་འདི་ དུས་རབས་༡༠་པ་ནང་ལུ་ འབྲུག་ལས་ཡང་ བླམ་དང་མཁས་པ་ མང་རབས་ཅིག་ཐོན་ནུག། དེ་ཡང་ རཏྣ་གླིང་པའི་སྐུ་ཕྲེང་སྔ་མ་ ལན་ཐེངས་གཉིས་དེ་རེ་ བུམ་ཐང་ལུ་འཁྲུངས་ཏེ་ གསང་སྔགས་ཀྱི་ཆོས་ལུ་ མཁས་པ་ཐོན་ཡོདཔ་ད་ ཧེ་མམ་འདི་གིས་ གཏེར་སྟོན་རྒྱ་ཞང་ཁྲོམ་པ་ བླམ་སྦེ་བསྟེན་ཡོདཔ་ཨིན་མས། དེ་ལས་ རྒྱུ་མཚན་གསུམ་པ་འདི་ དུས་རབས་༡༢་པ་དང་༡༣་པ་ནང་ འབྲུག་ལུ་ དཔེ་ཆའི་ལམ་སྲོལ་ དར་ཁྱབ་སྦོམ་སྦེ་ར་སྡོད་ནུག། དེ་ཡང་ ལྷ་ནང་པ་གིས་ སྤ་རོ་གཅལ་ཁ་ལུ་ དགེ་སློང་༡༧༠༠་དང་གཅིག་ཁར་ དབྱར་གནས་འཚོགས་ཏེ་ དུས་འཁོར་གྱི་བཀའ་ཆོས་ གནང་ཡོདཔ་ད་ ལོ་རས་པ་གིས་ བུམ་ཐང་ཐར་པ་གླིང་ཕྱག་བཏབ་སྟེ་ དགེ་སློང་༢༨༠༠་ལུ་ བཀའ་ཆོས་གནང་ནུག། དེ་མ་ཚད་ ལྷ་ནང་པ་གིས་ གཅལ་ཁ་ལུ་ དམར་མཆོད་ བཀག་སྡོམ་གནང་སྟེ་ སངས་རྒྱས་ཀྱི་གསུང་རབ་ལྷག་ནི་གི་ སྲོལ་བཙུགས་ཡོདཔ་ད་ བསླབ་གསུམ་རིན་ཆེན་ཐེམ་སྐས་ཀྱིས་གཙོས་པའི་ དཔེ་ཆ་ཡང་ མང་རབས་ཅིག་ བརྩམས་ནུག། དེ་སྦེ་ གོང་ལུ་བཀོད་དོ་བཟུམ་སྦེ་ དུས་རབས་༡༠་པ་ནང་ གཏེར་སྟོན་པ་མང་རབས་ཅིག་བྱོན་ལུགས་དང་ མཁས་པ་མང་རབས་ཅིག་ཐོན་ལུགས་ དེ་ལས་ དུས་རབས་༡༣་པ་ནང་ བཤད་སྒྲུབ་ཀྱི་སྡེ་དར་ཞིང་རྒྱས་ལུགས་ཚུ་ལུ་བལྟཝ་ད་ འབྲུག་ལུ་དཔེ་ཆའི་ལམ་སྲོལ་འདི་ ག་དེ་ཅིག་ར་ཕྱིས་རུང་ དུས་རབས་༡༠་པའི་སྔོན་གོང་ལས་ བྱུང་ཡོདཔ་ ཐག་ཆོད་ཨིན་མས།